Kryetari i Aleancës për Ardhmërinë e Kosovës (AAK), Ramush Haradinaj, ka përkujtuar 27-vjetorin e Masakrës së Reçakut, duke bërë homazhe në Kompleksin Përkujtimor në Reçak, në nderim të 45 shqiptarëve të paarmatosur që u masakruan nga forcat serbe.

Në një postim në Facebook, Haradinaj tha se Masakra e Reçakut, ashtu si edhe masakrat e tjera të kryera ndaj popullit shqiptar, përbën dëshmi të krimeve gjenocidale që aparati shtetëror serb ka kryer në Kosovë.

Ai shprehu mirënjohje të përjetshme për ish-ambasadorin amerikan, William Walker, i cili e cilësoi Masakrën e Reçakut si krim kundër njerëzimit, duke theksuar se ky vlerësim pati rëndësi të madhe në ndërgjegjësimin ndërkombëtar për krimet e kryera në Kosovë.

Po ashtu, Haradinaj falënderoi Shtetet e Bashkuara të Amerikës, duke thënë se ato kanë qenë dhe mbeten krah Kosovës në të gjitha periudhat historike.

Masakra e Reçakut ndodhi më 15 janar 1999 dhe konsiderohet një nga krimet më të rënda të kryera ndaj civilëve shqiptarë gjatë luftës në Kosovë.