Kandidati për kryeministër nga AAK, Ramush Haradinaj ka përgëzuar kryetarët e komunave për betimin e dhënë, me theks të veçantë 5 kryetarët nga radhët e AAK-së.

Përmes një postimi në Facebook, Haradinaj ka dënuar veprimet e kryetarëve të Listës Serbe, të cilët kanë hequr simbolet e Republikës së Kosovës dhe fotografinë e Presidentes nga zyrat, shkruan Arbresh.info.

“I përgëzoj të gjithë kryetarët e komunave që kanë dhënë betimin, me theks të veçantë 5 kryetarët prej radhëve të AAK dhe i inkurajoj të vazhdojnë punën e tyre në interes të qytetarëve dhe gjithmonë në përputhje me ligjin e Kushtetutën”, ka shkruar Haradinaj.

Tutje kreu i AAK-së ka kërkuar nga bashkësia ndërkombëtare që të ushtrojnë presion mbi kryetarët e komunave nga komuniteti serb që të respektojnë Kushtetutën dhe ligjet e Kosovës.

“Njëkohësisht jam tejet i indinjuar që kryetarët e Listës serbe në komunat veriore, i kanë hequr simbolet e Republikës së Kosovës dhe fotografinë e Presidentes dhe kërkoj që urgjentisht t’i rikthejnë në vendin që u takon. Po ashtu, edhe nga Komuniteti Ndërkombëtar, BE dhe ShBA, që të ushtrojnë ndikimin e tyre që kryetarët e komunave nga komuniteti serb ta respektojnë Kushtetutën dhe ligjet e Kosovës dhe të punojnë në harmoni me to”, ka shkruar Haradinaj./Arbresh.info