Kryeministri i Kosovës, Ramush Haradinaj, ka zhvilluar një darkë pune me Përfaqësuesen e Lartë të Bashkimit Evropian për Punë të Jashtme dhe Politika të Sigurisë dhe Zv. Presidente e Komisionit Evropian, Federica Mogherini, së bashku me Kryeministrin e Maqedonisë, Zoran Zaev; Kryeministrin e Shqipërisë, Edi Rama; Kryeministrin e Malit të Zi, Dushko Markoviq; kryeministren e Serbisë, Ana Bërnabiq; dhe Kryetarin e Këshillit të Ministrave të Bosnjës dhe Hercegovinës, Denis Zvizdiq.

Gjatë darkës, Haradinaj i ka thënë Mogherinin se Kosova i ka plotësuar kriteret për liberalizimin e vizave, bën të ditur një komunikatë nga Qeveria.

“Kosova ka shënuar progres në shumë procese të rëndësishme, të nevojshme për integrimin e vendit në familjen evropiane dhe për përmirësimin e jetës së qytetarëve të saj. Është një proces i gjatë për të cilin jemi të përkushtuar si Qeveri, andaj është e rëndësishme që kjo të vlerësohet dhe Kosova duhet ta marrë liberalizimin e vizave. Kosova ka plotësuar të gjitha kriteret dhe me të drejtë pret që çështja e vizave të jetë çështje javësh”, citohet të ketë thënë Haradinaj.

Forcimi i Bashkëpunimit Ekonomik Rajonal dhe rruga evropiane e vendeve të Ballkanit Perëndimor, ishin temat tjera që u diskutuan në këtë darkë pune me 6 Kryeministrat e Ballkanit Perëndimor, njofton komunikata.