Gjykata Kushtetuese e Kosovës ka konfirmuar se është duke shqyrtuar kërkesën e dorëzuar nga AAK lidhur me procedurën e votimit të fshehtë për zgjedhjen e kryeparlamentarit në Kuvendin e Kosovës.

Në një përgjigje për Arbresh.info, Gjykata ka bërë të ditur se “Kjo lëndë është duke u shqyrtuar. Për vendimmarrjen e Gjykatës do të njoftohen me kohë të gjitha palët e interesit dhe opinioni.”

AAK e kishte dorëzuar këtë çështje para rreth dy javësh, duke kërkuar interpretim kushtetues për mënyrën e votimit në Kuvend, në një situatë të cilësuar si bllokim institucional.

Megjithëse çështja ka rëndësi të madhe kushtetuese dhe ndikon drejtpërdrejt në funksionimin e institucioneve të vendit, Gjykata Kushtetuese ende nuk ka dhënë ndonjë afat kohor për vendimmarrje.

Kjo vonesë po ndodh në një moment kur vendi ndodhet në një ngërç institucional, duke e bërë edhe më urgjente nevojën për një sqarim kushtetues./Arbresh.info