Zëvendësministri për Komunitete dhe Kthim, Bajram Gecaj, ka pritur në takim delegacionin e Qeverisë së Shqipërisë në krye me Ministrin e Shtetit për Çështjet Vendore, Bled Çuçi, ambasadorin e Shqipërisë në Kosovë, Qemal Minxhozi dhe Deputetin e Kuvendit të Shqipërisë,Bashkim Fino.

Në këtë takim është vlerësuar bashkëpunimi i deritashëm midis ministrive dhe mekanizmave të pushtetit lokal matanë e këndej kufirit dhe është diskutuar për aktivitetet e radhës midis dy vendeve në fushën e vetëqeverisjes lokale.

Në mënyrë të veçantë është trajtuar bashkëpunimi ndërkufitar midis vendeve në kuadër të Programit IPA të Bashkimit Europian, shkëmbimit të përvojave në fushën e reformave lokale dhe në stimujt e mundshëm për zhvillim ekonomik lokal në mënyrë të veçantë përgjatë brezit kufitar.

Ministri i Shqipërisë, Bled Çuçi ka informuar në detaje Gecaj lidhur me reformat e ndërmarra kohëve të fundit në Shqipëri dhe janë diskutuar edhe përvojat në administrimin e implementimit në dy vendet tona.