Drejtori i Agjencisë së Kosovës për Akreditim (AKA), Naim Gashi, ka reaguar me entuziazëm pas lajmit për pranimin e Kosovës si anëtare me të drejta të plota në Regjistrin Evropian për Sigurimin e Cilësisë në Arsimin e Lartë (EQAR).

Përmes një postimi publik në faqën e agjencisë, Gashi e ka cilësuar këtë zhvillim si një arritje historike për vendin dhe për arsimin e lartë në Kosovë.

“Kosova, anëtare me të drejta të plota në EQAR! Me krenari ndajmë lajmin historik,” shkroi Gashi.

Ai theksoi se Kosova është vendi i parë në Ballkanin Perëndimor që arrin këtë status prestigjioz, çka tregon nivelin e përkushtimit për cilësinë në arsim dhe përputhshmërinë me standardet evropiane.

“Kjo arritje e jashtëzakonshme vërteton përkushtimin e Kosovës për arsim cilësor dhe standarde evropiane,” deklaroi ai.

Sipas Gashit, përfitimi i drejtpërdrejtë nga ky zhvillim do të jetë te studentët, diplomat e të cilëve tani do të kenë vulën e cilësisë evropiane, duke lehtësuar njohjen dhe mundësitë jashtë vendit.

“Diplomat tona tashmë bartin vulën e cilësisë evropiane, duke hapur dyert e së ardhmes për studentët tanë,” shtoi drejtori i AKA-së. Mes tjerash,Gashi falënderoi të gjithë ata që kontribuan në këtë proces.