Drejtori i drejtorisë së Bujqësisë dhe Pylltarisë në Gjilan, Ramiz Ramadani, ka njoftuar se fushata e korrje – shirjeve në Komunën e Gjilanit ka përfunduar me sukses, ndërsa nevojat vetanake për banorët e komunës plotësohen mbi 60 për qind, nga mbi 3 mijë hektarë të mbjellë me drithëra të bardha.

Ramadani i cili ishte edhe kryesues i komisionit për korrje – shirje, ka thënë se fermerët e Gjilanit kishin të mbjellë mbi 2800 ha me grurë, 90 ha me elb dhe 130 ha me tërshërë, ndërsa ishin të angazhuar 69 autokombajna në arat e Gjilanit.

“Prej mbi 2 800 hektarëve të mbjella me grurë janë siguruar rendimente prej 11 631 ton dhe plotësohen nevojat vetanake për banorët e komunës mbi 60 %. Varietetet dominuese tek bujqit tanë janë “Evropa”, “Renesanca”, “Pobeda” etj. si varietete të Novi Sadit, ndërsa ka filluar të depërtojnë suksesshëm edhe varietetet Kroate, Hungareze, Gjermane, franceze etj si: “Andino”, “Apaqi”, “Sirtaki”, “Euclid”, “Vullkan”, “Super zhitarka etj, ka informuar në fjalën e tij Ramadani.

Ai ka thënë se është respektuar çmimi i korrjes nga ana e kombajnerëve, duke potencuar se gjendja teknike e tyre ka qenë e mirë dhe gjatë gjithë koh ës e monitoruar nga komisioni.

“Çmimi për korrje – shirjen është respektuar nga ana e kombajnerëve, ashtu edhe siç është vendosur në fillim, e që ishte 110 euro / ha, sikur që janë respektuar edhe kushtet e korrjes së kulturave bujqësore. Komisioni gjithashtu ka përcjellë edhe gjendjen teknike të autokombajnave, që gjatë tërë kohës ka qenë e mirë”, ka thënë drejtori Ramadani.

Për vetëm dhjetë ditë është arritur që fushata të përfundoj në terrenet e rrafshëta që kapin 90 % të mbjelljeve të sivjetme. Për të vazhduar pastaj në terrenet kodrinore – malore, që rendimentet janë më të ulëta.

“Në terrenet e rrafshëta fushata ka përfunduar brenda dhjetë ditëve dhe rendimenti mesatar ishte 4380 kg / ha, kurse në viset kodrinore – malore ato silleshin nga 2800 kg / ha deri në 4000 kg / ha, ndërsa rendimenti mesatar për grurë, në nivel të komunës është 4154 kg / ha, për elb 4465 kg / ha dhe për tërshërë 1763 kg / ha”, tha ai.

“Rendimentet mesatare janë nën pritjet tona dhe në këto rendimente kanë ndikuar kushtet klimatike jo të mira, ku në kohën e pranverës kishim të reshura të shpeshta dhe kryesisht një mot të përcjellë me temperatura të ulëta, por edhe mos aplikimi i masave të domosdoshme agroteknike nga ana e fermerëve ka bërë që këto vlera të mos jenë më të larta”, tha për fund ai duke falënderuar të gjithë pjesëmarrësit për angazhimin, sjelljen korrekte dhe kontributin në përfundimin e suksesshëm të fushatës së korrje – shirjeve.

Drejtori i Bujqësisë dhe Pylltarisë, Ramiz Ramadani, ka apeluar tek të gjithë qytetarët e Komunës së Gjilanit, që të kenë shumë kujdes dhe të mos bëjnë ndezjen e hamulloreve, sepse kjo ndikon drejtpërdrejtë në rënie të rendimenteve gjatë të ardhmes, është rrezik për zgjerim të zjarreve dhe rrezikim të shtëpive por edhe jetës së njerëzve por depërtimi i tyre në pyje është në një formë shkatërrim i një pasurie që është e të gjithë neve pa dallim.