Efektivë të forcave speciale nga Shqipëria, Kosova, Shtetet e Bashkuara të Amerikës dhe Kroacia zhvilluan dje një stërvitje të përbashkët me synimin për të forcuar aftësitë ndërvepruese dhe operacionale, si dhe për të shkëmbyer përvoja ndërmjet forcave aleate dhe partnere.

Stërvitja u zhvillua në kuadër të bashkëpunimit të vazhdueshëm ushtarak dhe përkoi me 27-vjetorin e krijimit të Forcave Speciale të Shqipërisë.

Me këtë rast, shefi i Shtabit të Përgjithshëm të Forcave të Armatosura, gjenerallejtënant Arben Kingji, përcolli urimet e tij për të gjithë pjesëtarët e Forcave Speciale, duke vlerësuar lart profesionalizmin dhe kontributin e tyre.

“Forcat Speciale përfaqësojnë profesionalizmin, përkushtimin dhe dinjitetin më të lartë të Forcave të Armatosura dhe janë një burim krenarie kombëtare. Faleminderit për shërbimin dhe kontributin tuaj të çmuar në mbrojtje të sigurisë kombëtare dhe vlerave të Aleancës. #ROS#forcatspeciale”, ka shkruar ai në një postim në Facebook./Arbresh.info