Kryeministri në detyrë, Albin Kurti ka falënderuar mbështetësit për rezultatin në zgjedhjet e 28 dhjetorit.

Krahas atyre vendas, ai ka falënderuar edhe mërgatën që kanë ardhur të votojnë dhe kanë votuar në ambasada e konsullata për Lëvizjen Vetëvendosje.

“Puna vazhdon, siguria e begatia do të shtohen. Na priftë e mbara”, ka shkruar ai mes tjerash.

Reagimi i plotë:

Mirëdita të dashur qytetarë,

Në dhjetë ditë fushatë, dhjetëra mijëra duar të shtrënguara e mijëra dyer të hapura nga ju në qindra takime e tubime anembanë. Na pritët me ngrohtësi e besim, e për këtë ju falënderoj përzemërsisht. Jeni shumë, madje aq shumë sa shumicës nuk ua njohim e dimë emrin. Dhe, u angazhuat pa kursim për fitoren e VETËVENDOSJE!-s me partnerë, për fitoren tuaj.

Të dashur bashkatdhetarë që erdhët nga Evropa, Amerika e nga çdo cep i botës, ose që votuat me postë apo fizikisht pardje në ambasadat e konsullatat tona, u jemi mirënjohës përjetë për kontributin tuaj të pamatshëm për liri e shtet dhe komb, si dhe për përkrahjen vendimtare që e bëri fitoren në këto zgjedhje aq madhështore saqë historike.

Puna vazhdon, siguria e begatia do të shtohen. Na priftë e mbara!/Arbresh.info