“Misioni i EULEX-it nuk ka marrë përsipër përgjegjësi policore në Kosovën veriore”. Një gjë të tillë e konfirmon vetë Misioni Evropian për Sundimin e Ligjit në Kosovë.

Megjithatë, EULEX-it dekalron se këshilltarët policorë të lartë për veriun janë të vendosur në kompleksin e drejtorisë së Policisë së Kosovës për rajonin e veriut.

“Ata janë duke dhënë këshilla për këtë drejtori dhe katër stacionet policore nën komandën e saj, në lidhje me një sërë çështjesh që kanë të bëjnë me ofrimin e shërbimeve policore”, deklaron EULEX-i, raporton RTKlive.

Ky sqarim i EULEX-it pason një deklarim të presidentit të Serbisë, Aleksandër Vuçiq.

“Shpresoj që Shtetet e Bashkuara do të vendosin që misioni i NATO-s në Kosovë, KFOR dhe misioni i Bashkimit Evropian për sundim të ligjit, EULEX, do të kryejnë punën e policisë në veri të Kosovës”, tha Vuçiq të dielën, raporton RTKlive.

Kjo, pas vendimit të serbëve për t’u larguar nga të gjitha institucionet e sigurisë dhe të drejtësisë në katër komunat në veri të Kosovës.

Megjithatë, EULEX-i ka sqaruar se këshilltarja e këtij misioni për Kryeprokurorin e Prokurorisë Themelore të Mitrovicës dhe këshilltarja për Kryetarin e Gjykatës Themelore të Mitrovicës, janë duke e monitoruar nga afër situatën në këto dy institucione të drejtësisë.

EULEX-i konfirmon se Njësia Policore e Specializuar e EULEX-it (NjPS), e përbërë prej 105 zyrtarëve policorë polakë, ka shtuar më tej patrullimet mobile të vëzhgimit në veriun e Kosovën për informim të shtuar rreth situatës.