EULEX-i ka nisur procedurë disiplinore ndaj prokurorit Heikki Wendorf, i përfshirë në skandalin me kryeprokurorin Aleksandër Lumezi.

Finlandezi i shkroi letër Presidentes vetëm një ditë para dekretimit të Lumezit, duke thënë se dyshon që kryeprokurori është i përfshirë në aferë korrupsioni dhe përgatitjen e një vrasjeje, raporton KTV.

“Kjo çështje është duke u adresuar, por është çështje e brendshme e stafit”, është thënë në një përgjigje të EULEX-it.

Aty shtohet se misioni evropian nuk ka informacione të tilla, që Lumezi është përfshirë në krim e korrupsion.

Të tilla informata ka thënë se nuk ka as Prokuroria e Shtetit e as Këshilli Prokurorial, aty ku është verifikuar i gjithë aplikacioni i Aleksandër Lumezit.

Prokurori është pjesë e Task-Forcës, e cila funksionon në kuadër të Prokurorisë së Shtetit, e që po heton raportimet për korrupsion brenda EULEX-it.

Bashkë me të, hetimet po i kryen edhe prokurori vendës, Armend Hamiti.

Ai ka thënë se letra është dërguar vetëm nga Wendorf, në cilësinë e tij si prokuror i EULEX-it.

Çdo ditë e re e EULEX-it në Kosovë, për shoqërinë civile, është një skandal më shumë.