Prokurori i Shtetit ka autorizuar Policinë e Kosovës që të nisë hetimet paraprake në komunën e Obiliqit, me qëllim të verifikimit të saktësisë së rezultateve nga zgjedhjet e mbajtura më 28 dhjetor, si dhe për të përcaktuar nëse ka pasur shkelje nga personat përgjegjës.

Prokuroria Themelore në Prishtinë ka njoftuar se gjatë procesit të rinumërimit janë vërejtur dyshime për mospërputhje në rezultatet e kandidatëve për deputet pas përfundimit të numërimit të votave në këtë komunë.

“Gjatë këtij procesi, ka dyshime se janë vërejtur mospërputhje në rezultatet e kandidatëve për deputet pas përfundimit të numërimit të votave në komunën e Obiliqit. Në këtë drejtim, Prokurori i Shtetit ka lëshuar autorizim për Policinë e Kosovës që të fillojë hetimet paraprake, me qëllim verifikimin e saktësisë së rezultateve dhe përcaktimin nëse ka pasur shkelje të mundshme nga personat përgjegjës. Prokuroria Themelore në Prishtinë mbetet e angazhuar në mbrojtjen e votës së lirë të qytetarëve dhe trajtimin e çdo rasti të dyshuar, me synimin e ruajtjes së integritetit të procesit zgjedhor dhe sundimit të ligjit”, thuhet në njoftim./Arbresh.info