Shefja e kabinetit të kryeministrit, Vlora Dumoshi e ka ngritur lartë liderin e LDK-së, Isa Mustafa.

Ajo ka thënë se me qeverisjen e Mustafës, Kosova ka arritur të bëhet vend lider në rajon sa i përket rritjes ekonomike, reformave fiskale, stabilitetit financiar, uljes së papunësisë, e të tjera.

Sipas saj, vlerësimi i Bankës Botërore se Kosova ka shënuar rritje ekonomike, është vërtetuar se reformat e ndërmarra nga Qeveria kanë sjellur rezultate.

Lexoni komentin e plotë të saj:

Që nga fillimi i mandatit qeverisës nga Kryeministri Isa Mustafa, Kosova është bërë zyrtarisht vend lider në rajon sa i përket rritjes ekonomike, reformave fiskale, stabilitetit financiar, uljes së papunësisë, rritjes së përkrahjes sociale, rritjes së pensioneve, përmirësimit të ambientit të biznesit….

Progresin e jashtëzakonshëm të Kosovës, ndër të tjera, e ka konfirmuar sot edhe Banka Botërore, e cila zyrtarisht konfirmoi se Kosova ka shënuar rritjen më të madhe ekonomike në rajon, duke vërtetuar se reformat e ndërmarra nga Qeveria e Kosovës po japin rezultate tejet pozitive.

Është fat i madh që Kosova sot qeveriset nga një Kryeministër dhe një Qeveri e cila po merr vlerësime maksimale nga mekanizmat më kredibil global, e cila po merr Çmime si Qeveria më e mirë në rajon në adresimin e çështjeve ekonomike, që gëzon besimin e qytetarëve dhe të partnerëve strategjikë ndërkombëtarë, e cila po e avancon vendin dhe imazhin e saj.