Drejtori Rajonal i Policisë në Ferizaj, Nënkolonel Faton Pllana, së bashku me stafin e tij, priti sot në takim Zëvendëskomandantin e Komandës Rajonale Perëndimore të KFOR-it, Nënkolonelin shqiptar, Presim Ferataj.

Gjatë takimit, drejtori Pllana informoi Nënkolonelin Ferataj dhe ekipin e tij për situatën e përgjithshme të sigurisë në rajon, e cila u vlerësua si stabile dhe e qetë. Ai prezantoi gjithashtu disa nga aktivitetet e realizuara nga Policia Rajonale, me qëllim parandalimin e incidenteve dhe aksidenteve, si dhe ruajtjen e rendit dhe sigurisë publike.

Të dy palët diskutuan për thellimin e mëtejshëm të bashkëpunimit ndërinstitucional ndërmjet Policisë Rajonale të Ferizajt dhe forcave të KFOR-it, me synim forcimin e sigurisë dhe stabilitetit në rajon.

Takimi u zhvillua në një atmosferë të hapur, bashkëpunuese dhe me përkushtim të ndërsjellë për ruajtjen e një ambienti të sigurt për të gjithë qytetarët.