Konsulli i shkarkuar i Kosovës në New York, Lulzim Krasniqi, duke komentuar vendimin e Ministres së Jashtme  Donika Gërvalla për shkarkimin e tij, ka thënë se ajo (Gërvalla) kishte kërkuar në prill heqjen e flamurit të UÇK-së nga Konsullata.

Sipas tij, Gërvalla e kishte quajtur këtë flamur “flamur me simbole”.

“E, largimi i flamurit të UÇK-së, të cilin, ti, zonja Gërvalla, atë ditë prilli nuk ta zinte goja ta quaje flamur i UÇK-së, por e quaje “flamur me simbole”, është një turp i madh dhe ka për qëllim rrënimin e institucioneve, të cilën gjë me sukses ke arritur ta bësh në MPJD,” ka shkruar Krasniqi.

Krasniqi, këtë kërkesë të Gërvallës, e quan fyerje ndaj të gjithë dëshmorëve që ranë për liri të vendit.

“Në emër të këtij flamuri janë flijuar shumë dëshmorë, ndër ta edhe vëllezërit Bytyqi nga SHBA-ja, të cilët, bashkë me shumë luftëtarë të Batalionit Atlantiku, kanë lënë mirëqenien që u ofronte ky vend dhe kanë shkuar në Kosovë për ta çliruar atë nga shtypja, diskriminimi dhe gjenocidi që regjimi serb po i ushtronte ndaj nesh.

Largimi i këtij flamuri është fyerje e tre varreve të vëllezërve Bytyqi në Jonkers të Nju-Jorkjut dhe përbuzje për luftëtarët e Batalionit Atlantiku, njëjtë siç është fyerje për të gjithë luftëtarët dhe dëshmorët e vendit. Unë, sigurisht jam i zëvendësueshëm me njerëz të tjerë të rinj dhe entuziastë, porse flamurin e UÇK-së nuk mund ta zëvendësojë askush.”, tha tutje ai. /Reporteri.net/.

LEXO EDHE

“E pa precedentë”, Donika Gërvalla mbyll konsullatën e Kosovës në New York, me vendim arbitrar e largon nga detyra konsullin Krasniqi – Arbresh.info