Dita Ndërkombëtare e Mbulimit Universal Shëndetësor, e cila shënohet çdo vit më 12 dhjetor, ka për qëllim të promovojë aksesin universal në shërbimet shëndetësore për të gjithë individët, pa asnjë diskriminim.

Në këtë kuadër, Besim Kodra, përfaqësues i Shoqatës së të Drejtave të Pacientëve në Kosovë, ishte i ftuar në programin e mëngjesit në RTK, ku diskutoi rëndësinë e kësaj dite dhe sfidat që përballet Kosova në ofrimin e mbulimit universal shëndetësor.

“Ne si organizatë kemi vendosur që këtë ditë ta shënojmë në bashkëpunim me Ministrinë e Shëndetësisë, për shkak të temës që është caktuar nga Asambleja e Përgjithshme e OKB-së, që shëndeti është përgjegjësi e qeverisë. Ne, si organizatë mund të bëjmë punën tonë, keq e mirë, varësisht se si vlerësohet nga të tjerët, por shteti duhet të bëjë punën e vet me qëllim të garantimit të shërbimeve shëndetësore për çdo qytetar, kurdo që ka nevojë”, tha Kodra.

Ai theksoi se Kosova ka shumë vështirësi në shtrirjen e mbulimit universal shëndetësor, duke pasur parasysh disa probleme që lidhen me aksesin në shërbime dhe tarifat financiare.

“Sipas raportit të progresit të viteve të mëparshme, rreth 18% e qytetarëve nuk shkojnë fare te mjeku për shkak të pamundësisë për të mbuluar tarifat financiare. 34% e njerëzve kanë vështirësi në qasjen në shërbime për shkak të tarifave financiare, ndërsa 30 deri në 40% e qytetarëve duhet të paguajnë nga xhepi për shërbimet shëndetësore”, tha ai.

Kodra theksoi se ky vit ka shërbyer si një mundësi për të diskutuar këto probleme me Ministrinë e Shëndetësisë, me qëllim që vitet e ardhshme të bëhen hapa të rëndësishëm drejt garantimit të shërbimeve shëndetësore për çdo qytetar.