Deputeti i NISMA-s, Zafir Berisha e ka quajtur të papranueshme inicimin për fazën e re të bisedime me Serbinë nga ana e presidentit të vendit, Hashim Thaçi. Sipas Berishës, i pari i shtetit me këtë veprim po tregohet i papërgjegjshëm dhe mospërfillës ndaj rendit kushtetues dhe ligjeve në fuqi.

Deputeti i partisë së Fartmir Limajt konsideron se për bisedimet eventuale me Serbinë duhet të bëhet një platformë e përbashkët e spektrit politik. Më pas, ai vlerëson se Kuvendi i Republikës jep ‘dritën jeshile’ për negociata të mëtutjeshme.

“E kuptojmë pozicionin e tij (Hashim Thaçit v.j.) institucional që përfaqëson Kosovën në politikën e jashtme, mirëpo me bisedu me Serbinë në këto kushte është vazhdimësi e nënshtrimit ndaj regjimit fashist të Serbisë për të cilin ka bërë gjenocid në Kosovë. Për këtë situatë është fajtor edhe Thaçi i cili legalizoi bandat kriminale të Serbinë në institucione e deri tek Lista Srpska për të cilat Thaçi duhet të jep përgjegjësi”, ka thënë ai për “Indeksonline”.

Ndryshe, pas më shumë se pesë muajt, në Bruksel u takuan presidentët e Serbisë dhe Kosovës, për të vazhduar dialogun ndërmjet dy shteteve. Thaçi dhe Vuçiq dolën për herë të parë në opinion me mesazh të njëjtë.