Ministri në detyrë i Kulturës, Hajrulla Çeku, ka shprehur dhimbjen për humbjen e aktorit të madh Enver Petrovci.

“Sot e ndjeva Prishtinën më të heshtur”, shkroi Çeku në Facebook, duke përshkruar atmosferën emocionale në Teatrin Kombëtar, ku kolegë, miq dhe qytetarë i dhanë lamtumirën një prej figurave më të rëndësishme të skenës dhe filmit shqiptar.

“Ne teatër u mblodhëm për t’i dhënë lamtumirën artistit të madh të skenës e filmit, Enver Petrovcit, ikonës që i dha shpirt teatrit shqiptar dhe la gjurmë të pashlyeshme në kujtesën tonë. Enveri ishte mjeshtër i skenës, por mbi të gjitha ishte njeri i drejtë dhe i dashur me publikun e tij”, shkroi ministri në detyrë.

Çeku tha se takimet me Petrovcin ishin gjithmonë mësim për jetën, edhe në ditët e fundit të tij.

“Do ta kujtojmë me dhimbje, por edhe me krenari që vendi ynë pati një artist të tillë. Të qoftë i lehtë dheu i Kosovës, Enver Petrovci!”, përfundoi ai.