Presidenti i Shqipërisë, Bajram Begaj ka uruar shqiptarët me rastin e Vitit të Ri 2023.

Kreu i shtetit shqiptar ka uruar nëpërmjet një mesazhi një vit të ri sa më të mbarë, sa më të begatë, shëndet e mbarësi për të gjithë shqiptarët në Shqipëri, Kosovë, Mal të Zi, Maqedoni të Veriut, Luginën e Preshevës, për arbëreshët, dhe shqiptarët kudo në botë.

Begaj shprehet se vitin e ardhshëm, duke qenë se është vit zgjedhor, duhet të garantojmë një proces të qetë dhe brenda standardeve më të larta.

Sipas tij, të gjitha partitë politike duhet ta rigjejnë frymën e dialogut dhe bashkëpunimit duke theksuar se qëllimi i përbashkët i të gjithëve është përparimi i Shqipërisë.

Një urim të veçantë, Begaj e pati edhe për fëmijët.

Ai bëri thirrje që t’u qëndrohet pranë të rinjve në mënyrë që të ardhmen ta shohin në atdhe.

Në mesazhin e tij në prag të ndërrimit të viteve, Begaj ka prekur edhe situatën në rajon.

Sipas tij, “situata e rëndë dhe e patolerueshme e krijuar në veri të Kosovës duhet të marrë fund”.

Begaj thekson se vetëm dialogu dhe respektimi i integritetit të Republikës së Kosovës janë rruga e vetme e zgjidhjes së problemeve./tvklan.al