Demarkacionin me Serbinë, Qeveria është e bindur se do ta diskutojë në dialogun e Brukselit. Madje për këtë çështjet dhe tema të tjera si njohja e ndërsjellë mes dy shteteve, dëmshpërblimet e luftës si dhe pjesëmarrje në pasuritë, obligimet dhe të drejtat të cilat Serbia i ka trashëguar nga ish-federata e Jugosllavisë, pjesë konstitutive e se cilës ka qenë edhe Kosova i janë propozuar Bashkimit Evropian.

Ministrja për Dialog Edita Tahiri ka thënë përmes postës elektronike se BE-së i janë propozuar këto tema në mënyrë që ato të jenë agjendë e diskutimit.

Që këto tema do t’i paraqes për diskutim në Bruksel, ministrja Tahiri i kishte thënë Tribuna Channel qysh më 26 dhjetor të vitit të kaluar.

Por shteti fqinj është i vendosur që në Bruksel nuk do të diskutohet për kufirin mes dy shteteve, madje ky po shihet si provokim nga Prishtina zyrtare.

Shefi i Këshillit për Kosovën në Kuvendin e Serbisë, Milovan Drecun ka thënë për mediet në Serbi se në BE nuk do të ketë mirëkuptim për këtë, sepse dialogu po zhvillohet në formatin neutralitet ndaj statusit të Kosovës.