Tash kur punimet e urës së Ibrit kanë më shumë se gjysmë viti që kanë përfunduar, ura ende nuk është hapur.

Bashkimi Evropian i cili kishte finacuar me më shumë se 1 milion euro projektin për revitalizimin e urës së Ibrit, ka thënë për gazetën “Zëri” se shpresojnë që së shpejti do të ndodhë hapja e urës.

Gjithashtu nga Zyra e BE-së u bë e ditur se janë në kontakt dhe në bashkëpunim të vazhdueshëm me palën kosovare dhe atë serbe.

“Teknikisht puna për ta revitalizuar urën e Ibrit në Mitrovicë ka përfunduar. Bashkimi Evropian është duke bashkëpunuar si me Beogradin ashtu edhe me Prishtinën dhe beson se të gjitha marrëveshjet në lidhje me Urën e Ibrit do të implementohen sa më shpejt që është e mundur”, thuhet në përgjigjjen e BE-së për gazetën “Zëri”.

Bashkimi Evropian dje ka marrë akuza nga ish-kryenegociatorja e bisedimeve me Serbinë, Edita Tahiri, e cila tha se vonimi i hapjes së urës ka ndodhur për shkak të BE-së duke e quajtur dështim të tyre.

“Revitalizimi i urës dhe hapja e urës, që të dyja kanë qenë kompetencë e BE-së për shkak të ndjeshmërisë së temës dhe meqë nuk arriti ta hapë urën më datë siç e thoshte marrëveshja, për mendimin tim ky është dështim i BE-së”, ka thënë Tahiri për “Zërin”.

Ndërsa kryetari i Mitrovicës së Jugut, Agim Bahtiri për gjithë këtë vonesë e ka fajësuar homologun e tij në Mitrovicën e Veriut, Goran Rakic./Zëri/