Kryesia e Bashkësisë Islame të Kosovës, në mbledhjen e mbajtur më 10 shkurt 2026, ka njoftuar se mbështet fuqishëm marshin protestues “Liria ka emër”, i cili është paraparë të mbahet më 17 shkurt në Prishtinë.

Marshimi mbahet në mbështetje të çlirimtarëve të Kosovës që sipas BIK-ut, padrejtësisht po mbahen dhe po tentohen të dënohen në Hagë.

Sipas kryesisë, gjyqi në Hagë është një proces me prapavijë politike, me qëllim, siç thuhet, “atakimin e vlerave të UÇK-së”, thuhet në njoftimin e Bashkësisë Islame të Kosovës.

BIK-u thekson se UÇK-ja mbetet një vlerë sublime për popullin e Kosovës, e lidhur me lirinë, pavarësinë dhe dinjitetin e vendit.

Tutje thuhet se, kryesia ka vendosur që hytbeja e xhumasë, më 13 shkurt, në të gjitha xhamitë e Kosovës, t’i kushtohet 17 Shkurtit – Ditës së Pavarësisë, me mesazh përkrahës për luftëtarët e lirisë.

BIK-u mbështet gjithashtu deklaratën e Myftiut Naim ef. Tërnava kundër kërkesës së prokurores së Dhomave të Specializuara për dënimin e çlirimtarëve. Kryesia fton të gjithë qytetarët të marrin pjesë në marshin protestues më 17 shkurt në Prishtinë.