131 milionë e 800 mijë euro kanë paguar bashkatdhetarët që jetojnë në botën e jashtme që nga viti 2002 e deri në janar të këtij viti, në emër të taksës në kufirin e Kosovës.

Këto të dhëna i ka bërë publike kryetari i Komisionit parlamentar për financa, Naser Osmani, në seancën e rregullt të Kuvendit, raporton KTV.

Sipas tij, nga kjo shumë në emër të kompensimit të dëmeve, kompanitë e sigurimit të Kosovës kanë paguar vetëm 10 milionë e 260 mijë euro, ose 7.8 % të të hyrave. Ai ka shpjeguar se mungesa e Kartonit të Gjelbër dëmton rëndë ekonominë e Kosovës dhe bashkatdhetarët, si pasojë e neglizhencës së institucioneve, transmeton Koha.net.

Për çështjen e taksës kufitare është diskutuar edhe në mbledhjen e Qeverisë. Ministri i Diasporës, Valon Murati, ka kërkuar nga qeveria që të angazhohen të gjitha institucionet relevante të shtetit në mënyrë që bashkatdhetarët sa më parë të lirohen nga kjo taksë.