Banorët e rrugës “Brigada 153” në Hajvali po përballen me ndërprerje të energjisë elektrike në një fazë të rrjetit, gjendje që po u shkakton vështirësi në jetën e përditshme dhe për bizneset lokale.

Sipas tyre, ekipet e kompanisë kanë ndërhyrë disa herë, por për shkak të ngarkesës, ndërprerësi i Tensionit të Ulët ka reaguar dhe ka shkaktuar ndërprerjen.

KEDS njofton se ekipet po punojnë intensivisht për rregullimin e defektit dhe për të garantuar furnizim të qëndrueshëm me energji elektrike.

“Për problemin të cilin e keni parashtruar KEDS njofton se ka vetëm mungesë faze dhe nuk ka të bëjë me mungesën e energjisë elektrike në total.Ekipet e KEDS kanë intervenuar disa herë për këtë problem, por për shkak të ngarkesës, ndërprerësi i Tensionit të Ulët ka reaguar.Ekipet tona janë në terren dhe po punojnë me intensitet të lartë për rregullimin e kësaj prishjeje, për të siguruar energji elektrike në mënyre stabile për të gjithë konsumatorët”, thuhet në përgjigjen e tyre për Arbresh.info

“Patjetër, që në vijim do të njoftoheni për rregullimin e këtij problemi, deri atëherë u bëjmë thirrje konsumatorëve ta përdorin energjinë elektrike në mënyrë racionale, për të iu shmangur kufizimeve për shkak të mbingarkesave”, thuhet në përgjigje.

Ndryshe, përveç shqetësimeve të qytetarëve, Dhoma e Tregtisë dhe Industrisë e Kosovës (DhTIK) ka shprehur shqetësimin e saj për reduktimet e ashpra të energjisë elektrike që po aplikohen thuajse në të gjithë vendin. Sipas DhTIK-së, kjo situatë po shkakton rritje të kostove operative, humbje në prodhim dhe po rrezikon funksionimin e bizneseve./Arbresh.info