Pikat e kuqe të vendosura nga Lëvizja Vetëvendosje javë më parë po shfrytëzohen edhe për një protestë tjetër.

Këtë herë nga punëtorët e ndërmarrjes publike, Telekomi i Kosovës, shkruan arbresh.info.

Nën organizimin e Sindikatës së kësaj ndërmarrje me qindra punëtorë po protestojnë para ndërtesës së Kuvendit të Kosovës për të kundërshtuar bllokimin e llogarive bankare të ndërmarrjes dhe tërheqjen e mjeteve brenda llogarive nga z-mobile.

Kryetari i sindikatës, Lamih Balaj ka thënë se pronari i z-mobile, Blerim Devolli duke e quajtur kriminel ka thënë se po u mbyllë derën 3 mijë e 500 punëtorëve.

Ai ka shtuar se i njëjti po u humb nderin edhe deputetëve.

“Sot është koha e fundit që ju të mos shani më njëri tjetrin por të mblidheni dhe së bashku të mbroni ndërmarrjen. Krimi ua ka mbyllë derën 3 e 500 punëtorëve, po ua mbyll derën dhe nderin edhe juve, një kriminel dhe në mënyrën më banale”, ka thënë ai.

Balaj ka kërkuar nga deputetët t’i bashkohen protestës.

“Është e turpshme por bashkangjitnu këtu sepse ka edhe bashkëluftëtarët tuajt këtu. Ejani bëhuni bashkë sepse keni qenë këtu kur Telekomi i Kosovës ua ka mbushur buxhetin ”, ka thënë ai.

Ndryshe, arbresh.info javën që lamë pas ka raportuar ekskluzivisht për bllokimin e llogarive bankare të Telekomit të Kosovës.

Gjithashtu ka raportuar edhe për tërheqjen e rreth 3.5 milionë eurove nga llogaritë nga z-mobile./arbresh.info/