Kryetari i Gjykatës Supreme të Republikës së Kosovës, Enver Peci së bashku me gjyqtarin Shukri Sylejmani, kanë pritur sot në takim deputetin e Kuvendit të Republikës së Kosovës, Driton Selmanaj, në cilësinë zëvendëskryetarit të parë të Komisionit për Legjislacion, Mandate, Imunitete, Rregulloren e Kuvendit dhe mbikëqyrjen e Agjencisë Kundër Korrupsionit, me qëllim të diskutimit rreth zbatimit të ligjeve të caktuara që ndërlidhen me sistemin gjyqësor.

Deputeti Selmanaj e ka njoftuar kryetarin Peci, se Komisioni në fjalë, ka formuar grupin punues për mbikëqyrjen e zbatimit të Ligjit 06/L – 057 për Përgjegjësinë Disiplinore të Gjyqtarëve dhe Prokurorëve si dhe Ligjit nr. 04/L-139 për Procedurën Përmbarimore.

Kryetari Peci dhe gjyqtari Sylejmani sqaruan para përfaqësuesve të Kuvendit, mangësitë e hasura në ligjet përkatëse dhe sqarimet që Gjykata Supreme ka bërë duke nxjerr mendime juridike apo udhëzues, për paqartësitë dhe dilemat, posaçërisht të gjyqtarëve, si zbatues të këtyre ligjeve.

Bashkëbiseduesit u dakorduan që të rrisin bashkëpunimin në përpjekje për të forcuar sundimin e ligjit. /arbresh.info/