Ambasadori britanik: Autorët e sulmit në Banjskë të sillen para drejtësisë

17:07 | 24 Shtator 2024
E.G

Ambasadori i Britanisë së Madhe në Kosovë, Jonathan Hargreaves, në njëvjetorin e rënies në krye të detyrës së rreshterit Afrim Bunjaku, ka bërë homazhe para varrit të tij.

Ai, sulmin e 24 shtatorit të vitit të kaluar nga një grup terroristësh serbë në Bajnskë, e vlerëson si ngjarje tronditëse.

Me anë të një postimi në Facebook, ka thënë se i bën homazhe profesionalizmit dhe trimërisë së Policisë së Kosovës për aksionin e tyre për rikthimin e rendit më 24 shtator 2023, si dhe prokurorëve të Kosovës për punën e tyre paciente në zhvillimin e aktakuzës.

“Britania e Madhe vazhdon të kërkojë që autorët e këtij sulmi, përfshirë Milan Radoiçiqin, të kapen dhe të sillen para drejtësisë. Ne përsërisim thirrjen tonë ndaj Serbisë që të marrë masat e nevojshme për të siguruar që kjo të ndodhë sa më parë”, ka shkruar ai./Arbresh.info/