Tre persona kanë pësuar lëndime të lehta si pasojë e një aksidenti trafiku që ka ndodhur sot rreth orës 11:50 në magjistralen Kaçanik–Ferizaj, afër pompës së derivateve “Ada Gas”.

Lajmin e ka konfirmuar Arbresh.info zëdhënësi i Policisë Rajonale në Ferizaj, Kanun Veseli, i cili bëri të ditur se në aksident janë përfshirë dy vetura.

Sipas Veselit, shkaku i aksidentit ishte mosmbajtja e distancës së sigurisë.

“Sot rreth orës 11:50, në magjistralen Kaçanik–Ferizaj, afër pompës së derivateve “Ada Gas”, ka ndodhur një aksident trafiku mes dy veturave me targa vendore. Aksidenti ka ndodhur si pasojë e mosmbajtjes së distancës së sigurisë. Përveç dëmeve materiale, janë raportuar edhe lëndime të lehta trupore te njëri nga drejtuesit dhe dy pasagjerë. Pas marrjes së ndihmës mjekësore në emergjencën e Ferizajt, të lënduarit janë lëshuar për në shtëpi”, tha ai./Arbresh.info