Asociacioni i Gazetarëve të Kosovës (AGK), ka reaguar pasi gjatë raportimit në lidhje me vrasjen e cila ka ndodhur mbrëmë në Kodrën e Trimave në Prishtinë, janë penguar tre gazetarë.

AGK thotë se pengimi i punës së gazetarëve është i papranueshëm, dhe tutje i bën thirrje Policisë së Kosovës, që të krijojnë kushte të favorshme për gazetarët në situata të tilla, përcjell Arbresh.info.

Reagimi i plotë:

Gazetarët, Gresa Nitaj – Klan Kosova,Leonita Bajrami – Top Channel, dhe Venhar Isufi –Tëvë1, janë penguar, sot, gjatë raportimit  për një vrasje që ka ndodhur mbrëmë në Kodrën e Trimave, në Prishtinë.

Në një lidhje të drejtpërdrejt të gazetares Gresa Nitaj në një edicion informativ në Klan Kosova, shihet një burrë duke e kapur për krahu gazetaren, e duke mos e lënë të raportojë atë, si dhe duke i kërkuar të largohen edhe ekipet e Top Channel dhe Tëvë1.

Për Asociacionin e Gazetarëve të Kosovës, pengimi i punës së gazetarëve është i papranueshëm, andaj i bëjmë thirrje Policisë së Kosovës, që në situata të tilla të krijojë kushte të favorshme për gazetarët që të kryejnë punën e tyre, pa u cenuar, e penguar./Arbresh.info/