Drejtori i Shëndetësisë në Komunën e Ferizajt Bekim Ademi ka treguar  se aktualisht në këtë komunë janë 158 raste ndërsa 41 prej tyre janë të shtrirë në Spitalin e Ferizajt.

“Ata janë duke u trajtuar me oksigjeno terapi, por vlen të theksohet se tre prej tyre janë në gjendje më të rëndë. Por stafi ynë është duke u dhënë trajtimin e duhur”, tha ai për RTV Dukagjinin, përcjell Telegrafi.

Ademi ka kujtuar se nga fillimi i pandemisë në Komunën e Ferizajt janë prekur nga COVID-19 742 persona prej të cilëve 564 tashmë janë të shëruar.

Drejtori i Shëndetësisë në Komunën e Ferizajt thotë se për fat të mirë ditëve ka një trend në rënie të numrit të të prekurve me COVID-19 edhe në këtë komunë.

Ademi thotë se në bazë të testimeve që kanë bërë qytetarët e Ferizajt në institucione private shëndetësore vërehet se një numër shumë i madh prej tyre e kanë kaluar virusin.

“Iu mbetet institucioneve shëndetësore të mbledhin të dhënat dhe të shohim sa persona e kanë kaluar coronavirusin në Kosovë”, tha ndër të tjera Bekim Ademi.