Deputeti i Partisë Demokratike të Kosovës (PDK), Adem Grabovci, është dëshmitari i radhës i thirrur nga Prokuroria, për të dëshmuar në rastin e njohur MTPT.

Megjithatë, edhe pse seanca e së martës ka filluar në orën 10:00, Grabovci ka pritur pothuajse dy orë për thirrjen e tij për të filluar dëshminë.

Një vonesë e tillë ndodhi për shkak se prokurori i çështjes, Charles Hardaway  paralajmëroi se gjatë marrjes në pyetje të dëshmitarit Grabovci do të përdorë disa sms-ë, për çka nuk e kishte njoftuar mbrojtjen më herët. Aty kishte më shumë se dy mijë faqe sms-ë, dhe nuk ishte specifikuar se çka saktësisht do të përdoret.

Mbrojtësi i të akuzuarit, Fatmir Limaj, avokati Karim Khan, kundërshtoi një propozim të tillë. Mëgjithatë gjykata vendosi që të pranohen sms-ët në fjalë.

Deri më tani në këtë proces gjyqësor kanë dhënë dëshmitë e tyre edhe Mevludin Krasniqi, ish- këshilltar politik i ish-ministrit të Ministrisë së Transportit dhe Post Telekomunikacionit (MTPT) Fatmir Limaj, ish-zëvendës ministri në kohën kur Limaj kishte qenë ministër në MTPT, Emin Krasniqi, zyrtari i Agjencisë Kundër Korrupsion, Ekrem Demolli, etj.

Ndryshe, ky shqyrtim gjyqësor ka filluar të zhvillohet nga fundi i shtatorit të vitit 2015. Në aktakuzën e Prokurorisë Speciale të Republikës së Kosovës përfshihen pesë persona të akuzuar për keqpërdorime, marrje e dhënie ryshfeti dhe vepra të tjera, lidhur me disa tenderë që lidhen me ish Ministrinë e Transportit dhe Post Telekomunikacionit (MTPT).

Ndër ta janë ish Ministri i MTPT-së, Fatmir Limaj, ish Drejtori i prokurimit Nexhat Krasniqi, Endrit Shala, Shpërtim Telaku dhe Florim Suka./BetimipërDrejtësi/