Lidhja Demokratike e Kosovës ka mbledhur mbështetësit në Banjë të Istogut.

Kandidati për kryeministër nga ky subjekt politik, Lumir Abdixhiku tha se me 9 shkurt qytetarët do të orientohen nga e ardhmja.

“Do të vazhdojmë traditën e fitoreve, për Kosovën, shtet i pavarur e sovran, i anëtarësuar në NATO e mik me Shtetet e Bashkuara të Amerikës”, tha Abdixhiku që këtë e quajti mision të LDK-së.

“Unë dhe ekipi im besojmë në shtetin e Kosovës dhe ju ftojmë edhe juve të besoni në këtë shtet. Ju thërras të orientoheni nga e ardhmja. Ne jemi të mishëruar me idealin e popullit tonë që do liri, demokraci e përparim, dhe jemi të përcaktuar që ta ruajmë këtë shtet”, tha Abdixhiku para përkrahësve në Banjë të Istogut.

Abdixhiku tha se, Banja është rreshtuar fuqishëm prapa vizionit të LDK-së, sipas tij, për Kosovën përparimtare.

“Projektet tona për mbështetjen e bujqësisë, zhvillimin e turizmit dhe përmirësimin e infrastrukturës janë të qarta dhe të realizueshme. Fryma e fuqishme që po na shoqëron kudo është thirrje e qartë popullore për ndryshim, dhe garanci se më 9 shkurt do ta festojmë fitoren e madhe”, tha Abdixhiku .