Kryetari i Lidhjes Demokratike të Kosovës (LDK), Lumir Abdixhiku, ka pritur sot në selinë qendrore të partisë veprimtarin e shquar shqiptaro-amerikan, Harry Bajraktarin, një nga zërat më të fuqishëm të Kosovës në Shtetet e Bashkuara të Amerikës.

Në këtë takim u shpreh mirënjohja për kontributin e jashtëzakonshëm të Bajraktarit në afirmimin e çështjes kombëtare të Kosovës për lirinë, pavarësinë dhe shtetndërtimin, si dhe për rolin e tij në forcimin e pozitës së vendit në arenën ndërkombëtare. Kryetari i LDK-së vlerësoi veçanërisht angazhimin e tij në kohët më të vështira, kur ai përfaqësoi me dinjitet të drejtat e popullit të Kosovës para institucioneve amerikane.

Abdixhiku, në një postim në Facebook, ka thënë se Bajraktari, si mbështetës i palëkundur i Kosovës qysh në vitet e hershme, ka bashkëpunuar ngushtë me Presidentin Ibrahim Rugova, duke artikuluar kauzën e vendit tonë para politikëbërësve amerikanë, në një periudhë kur Kosova kishte nevojë jetike për aleatë dhe miq.

Kryetari i LDK-së e falënderoi Bajraktarit për kontributin e vazhdueshëm dhe e përshkroi atë si një mik të madh, zë të fuqishëm dhe mbështetës të paepur të Kosovës.