Profesorit i së drejtës kushtetuese, Florent Muqaj, i ka përmendur disa nga mangësitë që i ka Kushtetuta e Kosovës.

“Kemi 13 vite një Kushtetutë dhe prej atëherë kur është miratuar ky akt juridik dhe besoj që edhe hartuesit që e kanë bërë atëherë s’do e kishin besuar që do të kemi këto probleme. Megjithatë, në një shoqëri siç jemi ne në tranzicion, besoj që kur e shohim edhe në kontekstin krahasimor mënyrën se si bëhen zhvillimet kushtetuese në vendet e rajonit, mund të themi që zhvillimet që kemi pasë kanë qenë normale”, ka thënë Muqaj në Edicionin Special në Klan Kosova.

“Mendoj që kemi pasë mjaft probleme në aspektin e zbatimit të normës kushtetuese nga partitë politike. Ndoshta, fakti që ka pasë sidomos nga viti 2014, shumë mënyra sa i përket zbatimit të Kushtetutës nga ana e klasës politike, ka bërë që të shpërfaqen këto dobësi që i ka kushtetuta jonë”.

Muqaj theksoi që dobësitë kryesore sipas tij, që i ka pasë Kushtetuta për këto 13 vite, kanë qenë në aspektin e zbatimit të normës kushtetuese.

“Dobësitë kryesore që i ka pasë Kushtetuta jonë për këto 13 vite nga viti 2010 e deri sot kanë qenë në aspektin e zbatimit të normës kushtetuese dhe mënyrës si ajo normë ka prodhuar efektin e vet në praktikë. Si pasojë e kësaj, janë prodhuar shumë raste në Gjykatën Kushtetuese të cilat tani i kemi dhe këto raste  kanë krijuar edhe një normë të re kushtetuese”.