Për nder të 7 Marsit – Ditës së Mësuesit, kryetari i Prishtinës, Përparim Rama, ka ndarë mirënjohje për 75 mësimdhënës të cilët do të pensionohen deri në fund të këtij viti.

Në këtë ceremoni, e cila u mbajt në Gjimnazin Filologjik “Eqrem Qabej” në Prishtinë, kryetari Rama tha se kontributi i mësuesve nuk duhet të harrohet dhe assesi të nënçmohet.

“Ne e dimë se ndër breza, kontributi i mësuesve ka qenë jetik për mbijetesën e popullit të Kosovës, kontributi i tyre përmes arsimimit të brezave që më pas e formuan shtetin tonë, është madhështor, duhet ta çmojmë me shumë kujdes dhe nuk duhet të harrohet”, tha Rama në këtë ceremoni.

Ai theksoi se edhe në kohët e okupimit mësuesit janë përkujdesur që popullin mos ta lënë pa arsimim dhe shkollim, përkundër vështirësive që u përballën.

“Në kohën e okupimit jugosllav, okupimit të vështirë e barbar, kanë qenë pikërisht këta mësues, shumë prej tyre që po pensionohen tash, që nuk e kanë lënë kurrë popullin dhe fëmijët në veçanti pa mësim. Janë ndjekur, besa edhe janë vrarë, janë persekutuar, por kurrë nuk janë dorëzuar në misionin e tyre të madh, arsimimin e fëmijëve të Kosovës”, ka thënë Rama.

7 Marsi po festohet sot në mbarë vendin, si një ditë e veçantë për mësuesit./arbresh.info/