Kryetari i Lidhjes Demokratike të Kosovës (LDK), Lumir Abdixhiku, ka zhvilluar sot një takim pune me kandidatët e këtij subjekti që garojnë në balotazhin e 9 nëntorit.

Përmes një postimi në Facebook, Abdixhiku tha se LDK-ja është e përqendruar plotësisht në garat ku prijnë e garojnë kandidatët e saj, duke theksuar se të gjitha energjitë e partisë do të drejtohen drejt fitores.

“Çdo energji, çdo fokus, çdo aktivitet i LDK-së në këto ditë do të drejtohet vetëm për LDK-në. Do të drejtohet drejt garave tona; aty ku prijmë, aty ku garojmë, aty ku qytetarët tanë e presin fitoren e LDK-së”, shkroi Abdixhiku.

Ai tha se janë plot 9 komuna ku LDK sot garon; me 2 të fituara tashmë.

“Këtu mbetet puna jonë. Kështu projektohet LDK-ja jonë. Për veten, për kandidatët tanë e fitoret tona. Çështjet tjera periferike, ato të pas humbjeve e protagonizmave kohë-humbëse, do të trajtohen menjëherë pas 9 nëntorit; dhe atë qartë e drejtë.”u shpreh ai.

I njëjti njoftoi se LDK garon dhe pret fitore në nëntë komuna, Prishtinë, Pejë, Fushë Kosovë, Gjilan, Viti, Obiliq, Junik, Dragash dhe Suharekë, ndërsa dy komuna i ka fituar tashmë.

“Ju faleminderit, po ashtu të 180 mijë votuesve, përfshirë dhe ata në mërgatë, që po e vulosin LDK-në si parti të parë në këto zgjedhje lokale”, shkroi tutje kreu i LDK-së./Arbresh.info/