Osmani: Kosova ka nevojë më shumë se kurrë për zemër e afërsi mes njerëzve

09:15 | 12 Maj 2026
E.G

Kandidatja për presidente nga radhët e LDK-së, Vjosa Osmani, ka ndarë një mesazh për bashkim dhe afërsi mes qytetarëve pas një vizite në Vushtrri.

Përmes një postimi në Facebook, Osmani ka kujtuar vizitën e saj në Odën historike të Haxhi Feriz Zekollit, një vend që sipas saj simbolizon pajtimin dhe unitetin ndërmjet shqiptarëve ndër vite.

“Mbrëmë në Vushtrri, në Odën historike të Haxhi Feriz Zekollit – aty ku dikur shqiptarët lanë pas hasmëritë për t’u bashkuar si një, e sot po vazhdojmë të njëjtën rrugë: rrugën e bashkimit, të respektit e përkrahjes për njëri-tjetrin. Kosova ka nevojë më shumë se kurrë për zemër e afërsi mes njerëzve”, ka shkruar Osmani.

Ajo theksoi se vendi ka nevojë për më shumë solidaritet, respekt dhe mbështetje të ndërsjellë, duke e cilësuar bashkimin si rrugën më të rëndësishme për të ardhmen e Kosovës./Arbresh.info