Presidentja e Kosovës, Vjosa Osmani, sot do t’i adresohet Parlamentit Evropian, me ftesë të presidentes së Parlamentit Evropian, Roberta Metsola.

Njohës të çështjeve politike në vend po vlerësojnë së kjo është një mundësi e mirë për Kosovën, por se zhvillimet e fundit në veri të vendit do ta vendosin nën hije fjalimin e presidentes.

Për herë të parë një president i Kosovës do t’i drejtohet seancës plenare në Parlamentin Evropian. E këtë fjalim të presidentes së vendit, Vjosa Osmani, njohës të çështjeve politike në vend po e shohin si mundësi të mirë për Kosovën.

Artan Muhaxhiri i tha Radio Kosovës se fjalimi i presidentes është një rast i mirë për avancimin e pozitës së shtetit të tanishëm të Kosovës dhe krijimin e hapësirës për përkrahje më të madhe të BE-së ndaj Kosovës.

“ Ky fjalim do të duhej të ishte një mundësi shumë e madhe që presidentja e Kosovës të avanconte pozitën aktuale të shtetit tonë më një fjalim ku do të përfshiheshin edhe qëndrimet e tashme të shtetit të Kosovës por edhe vizionet për të ardhmen e vendit. Dhe me anë të tij, të krijonte përkrahje edhe më të madhe ndaj Kosovës”, ka thënë Muhaxhiri.

Muhaxhiri, shtoi se fjalimin e presidentes Osmani do ta vë nën hije situata e fundit e krijuar në veri të vendit, pasi nga ajo do të kërkohen shpjegime rreth daljes nga kjo situatë.

“ Në gjendjen aktuale që ndodhët Kosova mendoj që fjalimi i presidentes do të hijezohet nga ngjarjet në veri të vendit. Dhe efekti i këtij fjalimi nuk do të jetë maksimal pasi presidentja gjithsesi duhet të japë edhe shpjegime se çfarë ka ndodhur në veri dhe cilët janë hapat e shtetit të Kosovës për të zgjidhur bllokadën”, ka shtuar ai.

Edhe njohësi tjetër i çështjeve politike në vend, Blerim Burjani, i tha Radio Kosovës se fjalimi i presidentes para deputetëve të Parlamentit Evropian është i një rëndësie të veçantë pasi do të shpalosën problemet aktuale më të cilat përballët Kosova, si gjendja në veri dhe çështjet e tjera politike.

“ Në vazhdën e asaj qa po ndodh në Kosovë, ky fjalim është shumë pozitiv. Kjo është një mundësi e mirë për shpërfaqjen e problemeve aktuale të Kosovës dhe integrimeve evropiane që do të trajtohen nga presidentja si çështjet politike, situata në veri e deri të politika e jashtme e Kosovës e cila thotë se do ta përkrahë perëndimin në çështjen e Ukrainës dhe në çështje të tjera si aleate”, ka thënë Burjani.

Në njoftimin e presidencës thuhet se presidentja Osmani do t’i adresohet deputetëve të Parlamentit Evropian lidhur me arritjet e Kosovës dhe rrugën e saj drejt anëtarësimit në Bashkimin Evropian. Ajo do të shprehë mirënjohjen e qytetarëve të Kosovës për përkrahjen që Parlamenti Evropian ka ofruar për Kosovën që nga vitet e 90-ta. Po ashtu është bërë e ditur se Osmani do të takohet fillimisht me presidenten e Parlamentit Evropian, Roberta Metsolan, e pastaj edhe me udhëheqës të grupeve kryesore politike në Parlamentin Evropian dhe takime me përfaqësues të Këshillit të Evropës.