Ministri i Punëve të Brendshme, Xhelal Sveçla ka njoftuar se në vendin ku ka ndodhur sulmi i 24 shtatorit është gjetur dokumenti personal dhe vetura e Milorad Jevtic.

Sipas tij, kjo dëshmon se ai ka qenë bashkë me njësitin që kanë sulmuar Policinë e Kosovës.

“Dy javë pas sulmit terrorist në Banjska, vijojmë me zbardhjen e fakteve që vërtetojnë lidhjen direkte të Serbisë në organizimin dhe realizimin e këtij sulmi. Në vendin e ngjarjes ku ka ndodhur sulmi, njësitet policore kanë gjetur dokumentin personal dhe veturën e Milorad Jevtic gjë që dëshmon se ai ka qenë në njësitin që kanë sulmuar Policinë e Kosovës.”, ka shkruar Sveçla.

Ndër të tjera, Sveçla ka bërë të ditur se Jevtic njihet si një ndër bashkëpunëtorët më të afërt të Danilo Vuciq, djalit të presidentit serb Aleksandar Vuciq, duke shtuar se i njëjti kishte shoqëruar këtë të fundit në vizitën e tij në Kosovë.

“Terroristi Milorad Jevtic njihet si një ndër bashkëpunëtorët më të afërt të Danilo Vuciq, djalit të presidentit serb Aleksandar Vuciq. Nga 5 vizitat e fundit të djalit të Vuciqit në Kosovë, 4 herë ata kanë qenë bashkë në të njejtën veturë. Milorad Jevtiq është identifikuar edhe si njëri ndër sulmuesit e ushtarëve të KFOR-it më 29 maj në Zveçan.”, shtoi ai.

Ministri Sveçla tha se mbetet që të zbulohet nëse përveç Vuçiqit dhe strukturave të larta shtetërore serbe, a ka qenë edhe djali i tij në planifikimin dhe organizimin e sulmit terrorist.

“Mbetet që organet e sigurisë dhe hetimet të zbulojnë se përveç Vuçiqit dhe strukturave të larta shtetërore serbe, a ka qenë edhe djali i tij në planifikimin dhe organizimin e sulmit terrorist në Banjskë të Zveçanit.”, tha ai./Arbresh.info.