Mbushet me policë oborri i Kuvendit, pas miratimit të Ligjit për Pagën Minimale

14:59 | 14 Qershor 2022
Fjolla Bajraktari

Forca të shtuara të Policisë janë parë në oborrin e Kuvendit të Kosovës pas votimit në parim të Projektligjit për Pagën Minimale.

Në parkingun e këtij institucioni po qëndron Njësia Speciale e Policisë së Kosovës.

Projektligji për Pagën Minimale u votua sot me 68 vota për. Gjashtë deputetë abstenuan e kundër nuk kishte asnjë.

Opozita e ka kundërshtuar këtë projektligj duke e quajtur të turpshëm, derisa më herët kanë paralajmëruar se do t’i përdorin të gjitha mjetet demokratike për ta kundërshtuar votimin e tij.

Të hënën e kaluar ka pasur protesta nga veteranët e UÇK-së, të cilët kanë shprehur pakënaqësitë për mospërfshirjen e tyre në ngritjen e pagës minimale, që është propozuar nga Qeveria.

Më herët, pensioni i tyre ishte i lidhur me pagën minimale, por sipas Qeverisë ka pesë vjet që kjo është ndryshuar./eo/