Ka nisur para pak çastesh seanca e jashtëzakonshme e Kuvendit të Kosovës për debatin parlamentar rreth deportimit të gjashtë gylenistëve.

Shefi i Grupit Parlamentar të LDK-së, Avdullah Hoti ka deklaruar se ky veprim i javës së kaluar tregon se kryeministrin nuk e pyet askush dhe se ai nuk shtron kontroll mbi institucionet, raporton Arbresh.info.

Hoti tha se presidenti po ashtu ka tejkaluar autorizimet kushtetuese dhe ka shkelur Kushtetutën.

“Presidenti ka tejkaluar autorizimet kushtetuese, ka shkelur Kushtetutën dhe pasojat e saj dihen. Shteti i Kosovës duhet të ruajë rendin kushtetues dhe të sigurisë. Të gjitha këto janë shkelur të enjten që shkoi përmes interferimit të Ambasadës Turke dhe presidentit Erdogan”, ka thënë Hoti.

Hoti ka shtuar se LDK është mirënjohëse për mbështetjen e shtetit turk për momentet e vështira.

Ai ka thënë se Grupi Parlamentar i LDK-së kërkon që të votohet Rezoluta e cila përmban këto pika:

1. Drejtori i Policisë, kryeprokurori i shtetit, drejtori i AKI-së, ministri i Brendshëm, ministri Jashtëm dhe i Drejtësisë brenda tri dite të raportojnë me shkrim në Komision përkatës parlamentar
2. Të bëhet formimi i Komisionit hetimor parlamentar për të zbardhur këtë skandal që ka cenuar rëndë të drejtat njerëzore
3. Përgjegjësitë e këtij skandali të të japin llogari bazuar në Kushtetutën e Republikës së Kosovës dhe ligjet në fuqi dhe,
4. Kuvendi kërkon nga institucionet e rendit dhe ligjit në Kosovë që përgjegjësit e këtij skandali tu respekton e drejta për gjykim të drejtë, transparent sipas ligjeve dhe konventave ndërkombëtare përfshirë edhe të drejtën e ankesës./Arbresh.info