Bie numri i vatrave aktive me zjarr në Kosovë, ndërkaq për momentin katër vatra janë aktive në lokacione të ndryshme, shkruan arbresh.info.

Nehat Koqinaj nga Agjencia e Menaxhimit Emergjent për arbresh.info tha se numri i vatrave aktive me zjarr është katër, dhe se situata me zjarre në Kosovë ka rënë.

“Numri i vatrave të zjarrit ka rënë. Aktualisht janë aktive 4 vatra zjarri. Në  Suharekë , rajoni i Prizrenit janë dy lokacione në Vraniç dhe Bukosh, ndërkaq po ashtu edhe në lokacionin te Parku Nacional Bjeshkët e Nemuna, si dhe Janjevë – zjarr fushor dhe malor”, tha Koqinaj.

Tutje Koqinaj tha se përveç  njësive profesionale për  zjarrfikje për shpëtim janë edhe njësia e FSK-së dhe KFOR-i po ashtu.

“Në të gjitha këto lokacione, NJPZSH  janë në veprim, deri sa në rajonin e Pejës, Bjeshkët e Nemuna  në veprim përveç NJPZSH( Njësive Profesionale Zjarrefikje Shpëtim) janë edhe njësi të FSK-së dhe mbështetja sipas kërkesës edhe nga KFOR-i”, deklaroi Koqinaj.

Ndryshe kryeministri i Kosovës, Albin Kurti, sot ka shkuar për vizitë në Suharekë pas shpërthimit të zjarreve, prej ku është njoftuar për situatën me zjarre në këtë komunë./arbresh.info/