Universiteti i Shkencave të Aplikuara në Ferizaj sot e ka filluar vitin akademik për herë të parë si njësi akademike e ndarë nga Universiteti i Prishtinës “Hasan Prishtina”.

Udhëheqës të këtij institucioni thanë se këtë vit mbi 10 mijë studentë kanë konkurruar për një indeks dhe kjo e bën këtë Universitet mjaft konkurrent e të dëshiruar nga të rinjtë.

“Sot po shënojmë një ditë të veçantë sepse po fillojmë punën me Universitetin e Shkencave të Aplikuara prandaj nuk mund të themi se kemi pasur festë më të madhe se kjo. Ju e keni privilegjin që të jeni studentët e parë të Universitetit të shkencave te aplikuara dhe do të merrni diplomën me logon dhe me vulën e këtij universiteti, ju jeni ata që duhet të tregoni se e kemi merituar këtë emër”, ka thënë Agron Bajraktari rektor i Universitetit në Ferizaj

Edhe kryetari i komunës së Ferizajt, Muharrem Svarqa vlerësoi se një institucion i këtij niveli akademik është shumë i rëndësishëm për zhvillimin e gjithë komunës. Sipas tij tregu i punës ka nevojë për këto profesione prandaj avancimi i këtyre të rinjve ka një dobi të dyfishtë.

Edhe studentët shprehën kënaqësinë me afërsinë e shërbimeve tani në Ferizaj. Për ta ky universitet do të jetë një udhërrëfyes mjaft i nevojshëm në jetë.

Universiteti i Shkencave të Aplikuara në Ferizaj këtë vit akademik e nis me 550 studentë të rinj. Ndërsa mbi 2 mijë studentë ndjekin studimet në 4 drejtimet në shkallën Bachelor dhe Master.

Drejtimet e studimeve edhe sivjet janë Menaxhment industrial, Menaxhment i turizmit dhe hotelerisë, Shkencat e Inxhinierinë Industriale me Informatikë dhe Arkitektura e interierit dhe Dizajni i mobileve. Në të ardhmen janë premtuar drejtime të reja që lidhen edhe më profesione të tjera si në fushat mjekësore po ashtu edhe edukative.