Ambasada e Britanisë së Madhe në Kosovë ka dhuruar sot 5 vetura për Administratën Tatimore të Kosovës, të cilat do të jenë në dispozicion të Drejtorisë së Hetimeve Tatimore dhe Inteligjencës (DHTI).

Zëvendësministri i Financave, Punës dhe Transfereve Ilir Kapiti ka falënderuar shtetin britanik për ndihmën e deritanishme sidomos në fushën e hetimeve tatimore, e cila padyshim ka nevojë që të ketë përkrahje profesionale dhe proceduarale, pasi ka të bëjë me një fushë të ndjeshme.

Ndërsa, përfaqësuesi i Administratës Tatimore dhe Doganore të Britanisë së Madhe në Kosovë Simon Woodcock siguroi se përkrahja e tyre nuk do të mungojë edhe në të ardhmen duke thënë se ende kanë shumë ekspertiza për t’i ofruar Drejtorisë së Hetimeve Tatimore dhe Inteligjencës (DHTI).

Drejtori i Përgjithshëm i ATK-së, Ilir Murtezaj ka mirëpritur donacionin e Ambasadës britanike, teksa përmendi edhe mbështetjet tjera që ambasada ka dhënë në ekspertizat e ofruara, si dhe në ngritjen e kapaciteteve teknike duke ofruar pajisjet, veglat analitike, si dhe trajnime.