Ka dalë në treg libri i titulluar ‘Fjalor i mikrotoponimisë së Istogut’ nga dr.Sejdi Gashi.

Sipas recensuesve të kësaj vepre, prof.ass.dr . Naim Berishës dhe prof. ass.dr. Abdurrahim Maxhunit, libri “Fjalor i mikrotoponimisë së Istogut”, i autorit dr. Sejdi Gashi, padyshim se përbën një kontribut të çmuar në fushën e albanologjisë në përgjithësi e të onomastikës në veçanti.

Autori në këtë vepër ka sjellë një material të gjerë, 1200 njësi të vjela nga 52 fshatra të trevës së Istogut, si: emërtime fushash e tokash bujqësore, zabelesh, kodrash, brigjesh, lugjesh, livadhesh e kullotash, arash, lumenjsh, përrenjsh, trojesh, bjeshkësh e malesh, kro¬jesh, varrezash, qafa malesh, por edhe antroponimesh etj.

Mbledhja dhe sistemimi i onomastikës, në këtë rast i mikrotoponimeve ka vlerë të madhe gjuhësore e historike.

Përmes mikrotoponimeve të kësaj ana njihet më mirë prezenca e hershme e emërtimeve shqiptare, sikundër dhe ndikimet e huaja sllave e turke. /arbresh.info/