Lena Headey lë pas krahëve shpatat dhe intrigat e “Game of Thrones”, për t’iu përkushtuar një krize të botës reale.

“The Flood”, apo “Përmbytja”, quhet filmi i pavarur me buxhet të ulët, që i dedikohet krizës së refugjatëve në Europë.

Headey dhe bashkëprotagonisti i saj në “Game of Thrones”, Ian Glen, janë në rolin e zyrtarëve të Emigracionit, të cilët merren me rastet e emigrantëve që duan të mbërrijnë në Britaninë e Madhe.

“Ajo që po ndodh në botë është e tmerrshme. Mendoj se trajtimi kinematografik i krizës është gjëja e duhur për t’u bërë”, tha Lena Headey.

Titulli i filmit i referohet termit të përdorur nga disa politikanë britanikë, përfshirë ish-kryeministrin David Cameron, lidhur me valën e madhe të emigrantëve. Gjithashtu, edhe tabloidi britanik “Daily Mail” iu referua me termin “përmbytja”, fluksit të emigrantëve vitin e kaluar, kur kriza dominoi titujt e medieve botërore.

Filmi është ende në fazë produksioni dhe pritet të shfaqet në vitin 2018.