Në nëntor të vitit të kaluar KOSTT  dhe OST kanë nënshkruar marrëveshjen për themelimin e Bllokut Rregullues Kosovë-Shqipëri.

E këtë marrëveshje e kundërshtoi shteti serb duke e quajtur si të parealizueshme. Por, duket se ata u mjaftuan me këto deklarime teksa KOSTT nuk ka marrë asnjë reagim zyrtar nga Serbia.

Këtë për arbresh.info e ka konfirmuar zëdhënësja e KOSTT-it, Zana Bajrami.

Ajo ka thënë gjithashtu se reagimet nga Serbia kanë qenë të pritshme, pasi kjo e fundit ka përfituar në mënyrë të padrejtë rreth 65 milionë euro në emër të KOSTT.

“EMS (Serbi) vazhdon të bëj alokimin e kapaciteteve ndërkufitare të Kosovës me vendet fqinje si dhe të mbledh të hyrat nga alokimi i këtyre kapaciteteve. Gjithashtu, deri në vitin 2016 EMS ka mbledhur të hyrat nga tranziti i energjisë nëpër rrjetin transmetues të Kosovës respektivisht mekanizimi i ITC (Inter TSO Compensation). Nga viti 2008 e deri më tani nga alokimi i kapaciteteve ndërkufitare si dhe deri në vitin 2016 edhe nga tranziti i energjisë nëpër rrjetin transmetues të Kosovës, EMS (Serbi) ka përfituar në mënyrë të padrejtë rreth 65 milionë EUR në emër të KOSTT, andaj edhe reagimet nga ana e Serbisë në lidhje me Marrëveshjen për Bllokun Rregullues Kosovë-Shqipëri, kanë qenë të pritshme”, ka thënë ajo.

Bajrami ka thënë gjithashtu se KOSTT dhe OST kanë formuar grupet punuese të cilat po bëjnë përgatitjet për implementimin e marrëveshjes.

“Njëkohësisht janë formuar edhe grupet punuese profesionale nga KOSTT dhe OST, me qëllim që të bëhen përgatitjet e nevojshme për të bërë të mundur implementimin e marrëveshjes se bllokut AK, sipas planit te parashikuar në muajin Prill 2020. Marrëveshja e bllokut AK obligon palët të punojnë bashkërisht në operimin e bllokut te përbashkët sipas detyrimeve qe rrjedhin nga marrëveshja SAFA (Synchronous Area Framework Agreement) dhe SOGL (System Operation Guideline) dokumente të ENTSO-E si dhe ne harmoni me kodet nacionale te rrjetit”, ka shtuar ajo.

Pas nënshkrimit të kësaj marrëveshje u tha se me fillimin e implementimit të saj KOSTT do të shkëputet nga “ombrella” e Zonës Rregulluese serbe (EMS), dhe do të futet në Bllokun Rregullues me OST (Shqipëri).

Përfitimet milionëshe të Kosovës dhe Shqipërisë nga zbatimi i marrëveshjes Bllokut Rregullues

I pari i KOSTT, Ilir Shala kishte bërë të ditur se sipas kalkulimeve nga kjo marrëveshje kursimi do të ketë 4.0 milionë euro në vit.

“Me ketë Marrëveshje te Bllokut Rregullues AK, definohet dimensionimi i përbashkët i kapacitetit të rezervave të energjisë elektrike brenda Bllokut AK (Shqipëri-Kosove), ku sipas kalkulimeve te dakorduara, kursimi do te jete ~ 4.0 Milionë EUR ne vit, ku për: – OST (Shq) = 1.4 Milionë EUR – KOSTT (RKS) = 2.6 Milionë EUR Po sikur të operonin të ndara si dy sisteme, atëherë kostoja e kapacitetit të rezervave të energjisë elektrike do te ishte, në total: 9.7 Milionë EUR ne vit, ku për: – OST (Shq) = 2.6 Mil EUR – KOSTT (RKS) = 7.1 Mil EUR”, kishte bërë të ditur Shala.

E për këto  kishte reaguar shteti serb përmes drejtorit të të ashtuquajturës zyrë për Kosovën në Qeverinë e Serbisë, Marko Gjuriq.

Ai përmes një komunikate për medie ka bërë të ditur se Serbia është ndërtuese e elektro rrjetit të Kosovës.

“Shqipëria e madhe energjetike ekziston vetëm në ëndrrat shoviniste të disa politikanëve në Prishtinë. Serbia është pronare dhe ndërtuese e elektrorrjetit në Kosovë dhe për këtë kemi dëshmi të panumërta”, thuhej në komunikatën nga zyra e Marko Gjuriqit.

Gjuriq kishte pretenduar se kjo marrëveshje asnjëherë nuk do të arrij të zbatohet./A.Citaku/arbresh.info/