Ushtruesja e detyrës së Kryeprokurorit të Prokurorisë Speciale të Kosovës, Sevdije Morina, është takuar me përfaqësuesin e Bankës Botërore në Kosovë, Klaus Decker.

Gjatë këtij takimi, Morina ka njoftuar përfaqësuesin e Bankës Botërore, Decker, me sfidat e shumta me të cilat ballafaqohen institucioni i Prokurorit të Shtetit.

Në mes tjerash ajo ka bërë me dije se Sistemi prokurorial ka kaluar me sukses reformat rrënjësore që kanë hyrë në fuqi nga fillimi i vitit 2013, se Këshilli Prokurorial e ka themeluar Departamentin për krime lufte në kuadër të Prokurorisë Speciale të Republikës së Kosovës, i cili mbartë një sfidë në vete.

Morina, po ashtu ka potencuar se sfidë kryesore e Prokurorit të Shtetit dhe sistemit Prokurorial të Kosovës mbetet luftimi i krimit të organizuar dhe korrupsionit si dhe krimeve të tjera të rënda. Në këtë drejtim e ka njoftuar edhe me vështirësitë të cilat paraqiten në këtë drejtim.

Ndërkaq, Decker ka thënë se Banka Botërore është e interesuar të investoj në sistemin e drejtësisë, si dhe ka shprehu gatishmërinë për të ndihmuar dhe mbështetur Prokurorin e Shtetit dhe Këshillin Prokurorial të Kosovës.