Drejtori i Klinikës Gjinekologjike, Jakup Ismaili në një intervistë për Ekonomia Online ka thënë se aktualisht në Klinikën Gjinekologjike janë të hospitalizuara 16 paciente të infektuara me Covid-19, gjashtë prej tyre në oksigjenoterapi dhe një në gjendje të rëndë.

Sipas, doktor Ismailit të gjitha shtatzënat e atakuar me Covid në format më të rënda kanë qenë të pavaksinuara.

Ndonëse ditën e fundit numër i madh i shtatzënave kanë vdekur si pasojë e Covid-19, ai thotë se numri i vdekjeve është në proporcion me të tjerët.

“Aktualisht në Klinikën Gjinekologjike janë të hospitalizuara 16 paciente të infektuara me Covid-19. Gjashtë prej tyre janë në oksigjenoterapi dhe njëra është në gjendje pak më të rënduar të tjerat janë stabile”.

“Të gjitha shtatzënat frekuentohen në Klinikën Obsetrike-Gjinekologjike për atë arsye del një shifër më e lartë dhe vdekjet te shtatzënat bëjnë një jehonë më të madhe sepse një shtatzënë bartë një fëmijë në mitër, mirëpo prapë është numër proprocional me të vdekurit e tjerë. Të gjitha shtatzënat e atakuar me Covid në forma më të rënda kanë qenë të pa vaksinuara”, tha ai.