Shefi i diplomacisë austriake dhe kryesuesi i OSBE-së, Sebastian Kurz deklaroi se është i brengosur për shkak të retorikës provokuese nga Donjecku, si dhe planit për shtetin e ri.

Siç raporton AFP, forcat pro-ruse në lindje të Ukrainës, të cilat nuk e njohin Kievin zyrtar, njoftuan se janë duke formuar shtetin e ri – Malorusia në territorin e Ukrainës.

“Jam i shqetësuar për shkak të retorikës provokuese, të cilën e kemi dëgjuar nga Donjecku”, tha Kurz. Ai u bëri thirrje palëve në kontest që të përmbahen nga çdo deklaratë nxitëse, të cilat mund të rrezikojnë zbatimin e marrëveshjes nga Minsku dhe të sjellin në pyetje integritetin territorial dhe sovranitetin e Ukrainës, transmeton KosovaPress.

Më herët TASS ka raportuar se zëdhënësi i presidentit rus, Dmitrij Peskov tha se ideja për krijimin e Malorusisë është iniciativë personale e liderit të DNR-së Aleksandar Zaharçenko. AFP shkruan se shteti pritet të formohet pas referendumit dhe se do të quhet Malorusia, që është emër nga koha e carit në Rusi dhe është përdorur për të përshkruar hapësirën e Ukrainës së sotme. Zaharçenko tha sot se situata në Ukrainë është pa rrugëdalje dhe se për të dalë nga kjo gjendje duhet krijuar shtetin e ri Malorusia për një periudhë kalimtare deri në tri vjet.